Onte, nunha reunión co alcalde de Ourense, Gonzalo Pérez Jácome, representantes do Clúster da Función Loxística de Galicia, Apetamcor e a Confederación de Empresarios de Ourense, acadáronse importantes avances para optimizar a distribución urbana de mercadorías na cidade.
Entre as medidas acordadas destaca a flexibilización dos horarios e accesos para a carga e descarga no casco histórico, atendendo ás necesidades do sector HORECA e doutros negocios locais. O alcalde anunciou que o reparto podería ampliarse ata as 12.00 horas e que se estudará habilitar zonas próximas ao casco histórico para facilitar a distribución a pé noutras franxas horarias. Estas modificacións serán incluídas nunha nova ordenanza de tráfico, na que o Concello comprometeuse a contar coas achegas do Clúster.
Ademais, sobre a implantación dunha Zona de Baixas Emisións (ZBE), o Concello indicou que non tomará medidas ata que se esclarezan as cuestións legais que afectan outras cidades.
Desde o Clúster, destacamos a importancia de establecer unha liña de traballo estable co Concello para tratar os asuntos relacionados coa distribución urbana de mercadorías, garantindo un contacto técnico frecuente e a implicación no proceso de redacción da nova ordenanza. Estas medidas son un paso fundamental para garantir unha loxística urbana eficiente e sostible.
O noso xerente agradeceu en persoa ao Concello a súa disposición para traballar de forma conxunta en solucións que favorezan a competitividade e a sustentabilidade do tecido empresarial local.
